Krag vir vandag

with No Comments

Abba, ja my hemelse God en Vader,
dankie dat ek vanaand weer tot U kan nader.
U weet elke greintjie van my lyf is moeg
en hoe het ek die afgelope week geswoeg.

Kan ek een aand deurslaap, wil ek vra,
maar ek sit eers weer vandag se hartseer
hier by U deurboorde voete neer,
want hierdie las kan ek nie alleen dra.

Daar was twintig behandeling op my lys,
en U het vir my die volgorde aangewys.
Voor ontbyt al begin
anders pas almal nie in.

Vroeg oggend was ek lekker sterk.
Maklik om met groen pasiënte te werk,
maar later moes ek gaan na rooi
en die prentjie daar was nie mooi.

Vyftien behandelings om te gaan,
as ek so aftel weet ek U verstaan…

Elke pasiënt se saturasie is laag:
Die stress om te behandel knaag.
Tussen pype deur hou ek lesings dop
enige tyd kan sy hart ophou klop…

Twaalf behandelings oor
dankie dat U elke gebed hoor.

Een kon ek ‘n entjie laat loop
suurtsof en pype vasgeknoop.
By ‘n oop deur lê ‘n man effe geknak
en dis asof hy na sy asem snak.
Suster, jy moet vinnig kom kyk!
Toe ons terugstap lê daar ‘n lyk…

Here, ek vertel U dinge wat U weet:
Die PPE veroorsaak meer as sauna sweet.
die sweet loop af teen my been
soos ‘n warm Amazone reën.

Na tien behandeling gou drink en eet
anders gaan ek dehidreer van die sweet.
Die boodskap terwyl ek nog kou:
“Ek het hulp nodig, kom tog gou…”

Die vroutjie in saal C is in my bede:
Hulle het sewe jaar vir ‘n kind gewag,
en sy het vandag gehoor sy verwag,
maar in ‘n ander saal haar man oorlede.

Behandeling agt is van die lysie afgehaal
Avbob het hom sopas kom haal.
Ek het hom nog gister van U vertel –
is hy nou in die hemel of die hel?

‘n Foonboodskap tussendeur bring my van stryk:
“Ag sal jy asseblief na my oupa gaan kyk –
die hospitaal sê hy gaan vandag nog beswyk?”
Ek bid vir hom terwyl hy met betraande oë na my kyk.

Die lysie aangepas, nog drie by:
Siekes het dooies se beddens gekry…

Nege, agt, sewe ses,
Here ek doen my bes.
Vyf, vier, drie, twee, een
Here ek kon nie hierdeur alleen!

Here, die pasiënte gaan min slaap kry,
want hulle gaan die hele nag vir asem stry.
Wil U met elkeen op my lysie wees
vul hulle met die asem van U Gees.

Amen

In die bed sit ek gou die tablet aan:
Wat gaan in die res van die wêreld aan?
Gou kos vir Covid familie met Shoprite sixty stuur.
Vriende antwoord waar hulle suurstof kan huur.

Verlede naweek moes ek ook werk,
nie tyd vir my gesin of die kerk
Ek het so gesmag om more te kan rus,
maar sopas gehoor dat daar te min hande is.

Terwyl ek my bekommer oor bed ses se oom
val ek weg in ‘n diepe droom…

O Here, dankie vir ‘n nag se slaap,
jammer dat ek nou eers gaap…
Buite is dit nog donker en koud,
vir die dag wat voorlê is ek benoud.

Dankie vir wat ek nou in U Woord kon lees
dankie dat U my daardeur vul met U Gees.
Ek het weer daardie bo-alle-verstand-vrede,
U is die enigste bly-wees rede.

U het so weer met my gepraat
en gevul met die dag se krag en raad.
U het my ook beter laat verstaan,
hoekom ek vandag terug moet gaan:

My dogter, Ek het jou oor baie jare opgelei,
‘n meer ervare intensief werker kon Ek nie kry.
Oor al die jare was jy in Woord en gebed,
Ek plaas jou daar waar Ek wil red.

Ek het lank vooruit reeds bepaal
dat ek daardie omie gister sou kom haal
Vooruit was dit ook al swart op wit
dat voor dit moes gebeur, sou jy kom bid.

Hier by die feesmaal van die Lam
sit die omie, sy oë nog effens klam.
Hy het vandag My heerlikheid gesien,
‘n ewigheidsvreugde onverdien.

Here, vandag is daar drie en twintig op die lys,
sal U asseblief vir my die pad daardeur wys.
En as ek dan so biddend daardeur gaan,
help my om tot by nommer een te bly staan…

Amen

Sewe tot sewe (sonder video)

with 2 Comments

Sewe tot sewe,
ek veg vir sy lewe.

Die ou oom se paniekbevange oë
wat bokant die masker uitstaar
en met sy gehoor apparaat onklaar,
maak my so diep bewoë…

Dokters en ander kan kom en gaan,
maar by sy bed moet ek bly staan
en dit terwyl ek die tekens verstaan,
waar die virus met hom heengaan…

Natgesweet onder lae van beskermende drag.
Min vloeistof want die badkamer moet wag.
Fisies uitgeput want ons is nou te min,
want ander is aangesteek, selfs my vriendin…

Sewe tot sewe
bene van moegheid bewe.

Soos ek huistoe ry
vreet die onsekerheid my.
My kind wat my met ope arms ontvang:
Sê nou ek steek hom aan, ek is bang…

Sewe tot sewe,
die oom nog aan die lewe.
Die bed oorkant is nou leeg
dood statistiek op beweeg…

Sy hand gryp met kneukels wit:
Sal jy kans sien om vir my te bid?
‘n Gebed vir vrede
is beide se traan se rede.

Sy familie kan nie eers kom –
ek is dit nou vir hom.
Nog medisyne vir die pyn
en suurstof deur die lyn.

Sewe tot sewe,
hierdie is nie ‘n lewe.

Man sonder werk.
Geen diens by die kerk.
Kos voorraad beperk.
Here, hou my sterk…

Sewe tot sewe,
my lippe bewe.

Ek mag nie ‘n Bybel in die saal invat,
want alles word met die virus beklad
Tyd is daar nie meer veel,
ek moet die boodskap deel:

Die Here is my Herder, niks sal my ontbreek
vir waters van rus kan ons Hom smeek.
Al sal ek deur dood skaduwee gaan,
is Hy die Een wat saam met my gaan…

Sewe to sewe
more begin ek veg vir ‘n ander lewe…

Vier uur

with No Comments

Vier uur op die eerste dag
kom die sms waarvoor ek wag,
ja, sluip Covid in soos ‘n dief:
Jy is positief…

Vier uur wasem teen die kar se ruit:
ongevalle te vol, ek kan eers in as iemand uit.
Ek kyk hoe die ligte van die ambulans
patroontjies op die lykwa dans…

Die intensief se vier uur koor
is nie bedoel vir enige gehoor.
‘n Geroggel en gehyg is die sang,
van almal wat na asem verlang.

Susters met donker vieruur oë,
met meer druk as hul vermoë.
Gordyne word haastig toegeruk
en pype in platval longe ingedruk.

Tuis en gesond, maar weke later
voel ek steeds vier uur trane water.
‘n Laken wat ‘n jongvrou liggaam toevou,
haar bleek slap hand bly ek onthou…

Vier uur sal nooit weer dieselfde wees,
van nou af is dit ‘n tyd van gebed
knielend hier langs my bed:
Vul my met die asem van U Gees!

 

Vir nog ‘n gedig oor Covid, lees ook: Sewe tot sewe

Ek wag vir krag

with No Comments

Met my planne hardloop ek voort,
sonder om te vra: Waar is U noord?
Here, ek het my lewe vol geprop,
maar U het my nou gestop.

Soos Israel, het ek vir die vyand bang geraak
en bondgenootskappe in Egipte gaan maak.
Maar dit was sonder U gewees,
dat was nie onder leiding van U Gees. (Jes 30:1)

Here, U vat nou my krag,
want ek moet leer van wag.
U wil dat ek weer onthou:
Ongeduld is die sonde van nie vertrou…

Ek wag op U Here, voor ek vandag in loop,
op U Woord vestig my hele wese my hoop. (Ps 130:5)
U beloof ek as ek op U wag en eers stilstaan
dan sal ek in my hoop nie beskaamd staan. (Jes 49:23c).

Here, Israel wou nie hoor, en bly wag
toe U sê: In kalmte en vertroue lê julle krag!
Eers as jy jou bekeer en rustigheid het
sal Ek kom en jou kom red. (Jes 30:15)

U wag om vir my genade te betoon
U ontferming, HERE, is my loon,
want U is die God van reg, elke dag.
U beloof geluk as ek op U wag. (Jes 30:18)

As ek so op U wag,
gee my genoeg krag.
Gee my arendsvlerk ‘n nuwe veer,
net genoeg om vandag se vlug te beheer.
Help my om te kan verstaan,
wanneer U wil dat ek moet staan.
En as U wil dat ek loop en swoeg,
U beloof, op U pad word ek nie moeg.
En as U wil dat ek hardloop op U pad,
dan word ek nie afgemat! (Jes 40:31)

Here, wat is vandag se eerste tree?
Een wat my sal vreugde gee,
want dis op U gekose weë?
U het beloof as ek wag sal U optree! (Jes 64:4)

Ek wag
vir krag.

Van ‘n skaakspel by ‘n verjaarsdag vertel

with No Comments

‘n Goddelike skaakspel is begin…
Vasti wou nie die koning bekoor.
Die koning word toe baie kwaad
en vra sy amptenare se raad.
So het sy haar status verloor
en Ester word toe die koningin.

Paleisbeamptes wou die koning vermoor.
Mordegai het by die poort daarvan gehoor.
Deur Ester is die koning daarvan vertel.
“Skryf dit in die annale” was sy bevel.

Hier by ons in Rooihuiskraal
ontwikkel ‘n soortgelyke verhaal:
Satan het skaak stukke begin skuif
daarteenoor is ds Tinus ingelyf…

Haman: “Die koning het my vereer
so, buig jul almal voor my neer!”
Mordegai het nie gebuig voor die bevel.
Die dienaars het vir Haman gaan vertel.

Haman het toe agteraf geknoei
om die Joodse volk uit te roei.
Op die twaalfde maand val die lot
vir uitwissing deur die koning se gebod.

Mordegai het sy kleure geskeur
en in die stad geloop en treur.
“Miskien het jy juis dié posisie gekry
om so die volk van uitwissing te bevry!”

Met ‘n koningin skuif Satan ons in skaakmat
en so is ons geliefde Willem weggevat.
“Ds Tinus miskien het jy juis dié posisie gekry
om so ons gemeente van uitwissing te bevry!”

Ester het haar voorberei
om ‘n spreekbeurt by die koning te kry.
Sy het ‘n maaltyd gevra,
om daar haar boodskap oor te dra.

Die wet van Mede en Perse is vas,
maak nou eerder ‘n nuwe wet.
“Verdedig julle self” is toe gelas.
So is die volk van uitwissing gered.

Wat by ons gebeur het is ook vas,
maar ons dank God dat ons ds Tinus het:
‘n Man met wysheid en nederig in gebed.
In die afgelope twee weke dra hy vir ons die las.

Ds Tinus dankie vir wysheid.
Dankie vir jou ekstra tyd.
Mag jou verjaarsdag besonders wees.
Mag jy gevul word deur die Heilige Gees.

Ester se geskiedenis wil ons leer:
Belangrike skaakstukke val soms neer.
Satan kan met sulke skuiwe tyd verdryf,
maar skaakmat bly God’s laaste skuif!

Ons bede is dan dat wanneer jy weer verjaar,
ons sal sien ons gemeente is van uitwissing bewaar.
En dat ons pad die jaar, saam met jou, sal wees
een wat uitloop op ‘n ewige vreugdefees!

Verruil die leuen vir die Seun!

with No Comments

Hulle lyftaal het duidelik gewys…
Soekende oë het my deurboor…
Met verwagting het hulle kom hoor:
Kan die Evangelie die pad aanwys?

Here, ‘n storm is in my gemoed:
Ek het gister drie mense ontmoet,
Sherie, Francois en Jean –
Help hulle om U wil te verstaan.

Die tentjie by die sentrum opgeslaan,
is vir dié haweloses ‘n luukse bestaan
Hulle sê, wat ek minstens kan weet,
is dat hulle nou lekker kan eet.

Die virus het hulle van die straat afgehaal.
Na vier dae kom hulle nou tot verhaal,
want hulle het nog nie weer dwelms gebruik
en jy kan nie meer die straat aan hulle ruik.

Lank terug het hulle ‘n huis gehad,
intussen is hulle kinders ook weggevat.
Hier by die sentrum kom soek hulle sin:
‘n Kans van ‘n leeftyd om oor te begin.

O Vader, ek bid dat hulle Satan se leuen
sal verruil vir die waarheid van U Seun.
Gee dat hulle in dié tyd U sal vind
en prewel: Abba, Vader, ek is U kind!

Die dwelms verdoof net die pyn van sonde…
U vergeef en neem dit permanent weg.
U vee trane af en genees al die wonde.
U was hulle skoon al was hulle hoe sleg!

Die dwelms is ‘n wrede slawerny…
Sal, U hulle asseblief daaruit bevry?
Laat hulle ware bevrediging leer
en met hulle nuwe lewe U vereer!

Die dwelms gee net verbygaande plesier…
U einddoel vir hulle is iets wat ewig duur:
Want U maak haweloses bymekaar.
Die bruilofsmaal wag vir hulle daar.

Open daardie oë wat my so deurboor.
Laat hulle glo as hulle dié Boodskap hoor.
Laat hulle knielend voor U buig
en as wedergebore kinders juig!

Siende blind

with No Comments

Ek ken haar al as kind,
ja, sy was nog altyd blind,
maar haar ander sintuie het my geleer
sy sien eintlik soveel meer…

Op die plaas het ek geloop en kyk,
maar haar sintuie het my sig verryk.
Soos ons loop het sy my hart geraak,
want God se skepping het ontwaak:

As ons voete op die warm, droeë tweespoorpaadjie brand,
luister ons hurkend hoe die miskruiertjie spartel in die sand.
As ons diep teue van die soet blommetjie van die doringboom ruik,
word ons bewus van die gezoem van die bye in die geurige struik.

As ons strelend voel hoe die blare verlep hang
en ons trane rol saam met kwêvoël se hartseer sang,
as die kriek se stem bewend kraak
weet ons land lê droog en braak.

Die reuk van warm beesmis
en gonsende vlieë wat honger is,
en ‘n kalfie wat vergeefs die speen pluk
laat dit my die knop in my keel wegsluk.

Dié nag hoor ek haar biddend smeek
dat God tog die land moet deurweek,
dat sy Sy wonderdade kan “sien”,
al is dit nie wat sy verdien.

Vroegdag pluk sy my opgewonde uit die bed
“Kom ‘kyk’ hoe lyk die verhoring van gebed!”
Ek voel effe jammer vir haar,
want ek kan nie reën gewaar…

Voel jy die koel luggie teen jou wang?
Hoor jy die voëltjies se opgewonde sang?
Die vibrasie wat hier bo ons koppe draai,
is swaeltjies wat vreugdevlerke swaai!

Hoor jy die sagte plof?
Dis die eerste druppel in die stof!
Die sinkdak roep juigend uit:
God stort sy liefde op my uit!

Met palms omhoog voel ons elke druppel.
Strome water laat ons kinderlik huppel.
Soos die modder deur ons tone krul,
word ons harte met lewende water gevul.

Stroompies water begin loop.
Ons proe – dis so soet soos stroop!
Net daar in die reën,
word ek toe geseën:

My vriend, jy wat dink jy kan sien,
‘n gawe van God so onverdien,
jy moet weer al jou sintuie gebruik –
Jy kan so selfs God se werke ruik!

Loop blindelings met God aan die hand
weer kaalvoet in die warm sand.
Luister in stilte na die natuur –
God praat met jou in dié uur!

Jou grootste voorreg is dat jy kan lees,
in jou Bybel, van Jesus en die Gees.
Jy is tog so siende blind,
glo weer daarin soos ‘n kind.

Daardie dorre droogte in jou lewe –
Sluit jou oë, en Hy sal jou vergewe!
Druppels water sal op jou reën
en waterstrome uit jou sal ander seën.

Ek voel die koue windjie op my wang se traan.
Ek sien die swaeltjies vlieg en ek verstaan.
Die donderweerstem uit die donker wolk ontplof
en ek val biddend voor Hom in die stof…

Oppad na die finale uur

with No Comments

As jong kind het ek voor ‘n skildery gestaan:
‘n Breë pad het die goddelose weg gebaan –
Met vreugde het duisende daarop gegaan.
‘n Smal pad na die hemel het ek verstaan.
Rondom die paaie was mooi natuur
almal oppad na die finale uur…

Na veertig jaar moet ek jou vertel
dat ons dié eenvoudsbeeld moet herstel:
Ons skildery is Johannesburg se kaart
waardeur almal jaag met volle vaart.
Afdraaibane op elke liewe hoek
met die GPS wat die korste pad bly soek.

Maar dan besef ons ook nog gou
dat ons die kaart verder oop moet vou.
Ons vriende en familie het die wêreld vol gevlug.
Facebook bring ons daagliks van hul berig:
Publieke vervoer keuses van moltreine,
lughawens met groen en rooi seine…

Skole met “Mik hoog”as leuse.
Honderde vakke as keuse.
Beroepsvoorligters kan nie eers alles lys,
wat nog om vir jongmense die pad te wys.
Watter huweliksmaat?
Gee tog raad!

Watter werk?
Watter kerk?
Watter dokter vir my kwaal?
Nog ‘n krisis sê die skaal!
Nog geweld?
Steeds nie geld…

Chemoterapie,
of dalk nie?
Pensioen te min.
Parkinsons begin.
Niemand sien die mooi natuur
almal oppad na die finale uur…

Weet jy ooit nog waar is noord?
Word soggens stil in God se Woord.
Die regte skildery
sal jy daar kan kry.
As die lewe jou deurmekaar wil maak,
wil God dat jy van Hom afhanklik raak.

Die GPS wat jy reeds het
is die krag van jou gebed.
Moenie sommer net raai
by jou lewenspad se draai,
Honderde kere élke dag
gee dit jou besluite krag!

Jy kan nie uit die maalkolk uit,
maar jy kan wel besluit:
Ek en my huis sal die Here dien
in al die swaar sal Ek Hom sien,
want Hy is aan my stuur
oppad na die finale uur!

MEER OOR TOTUEER

with No Comments

Ek het my laat lei deur die Gees,
oor wat in hierdie bundel moet wees.
Ek skrywe die bundel met ‘n rede,
Ja, dít is my opregte bede:

Laat dit oor aan die Heilige Gees,
wat hierdie bundel jou laat lees.
So lei Hý jou nader en nader
aan jou enigste God en Vader.

Ek kan nie die hele Bybel verklaar,
ek tree maar net hier en daar.
Dit wil jou net weer laat soek,
na die antwoorde in die ware Boek.

‘n Dankgebed

with No Comments

O genadige God en Heer,
aan U kom toe alle eer!

My passie was altyd my werk
en ‘n groot dryf by die kerk…
Ek sit ook altyd baie in
vir my kosbare gesin.

Maar ten spyte van dit was ek verlore,
want ek was nie wedergebore…

Ek het die Bybelse lerings met my brein verstaan,
maar ten diepste het dit oor myself gegaan.
Mense het van buite ‘n mooi voorbeeld gesien
‘n nuttige lewestyl om mý begeertes te verdien.

Maar U, o God het my omgekeer
en my die ware gebed kom leer,
Nie: “My werk, my kerk en gesin: Gee meer en meer…”
Nee: “Jesus verander my om U bo alles te begeer.”

As ek nou U Woord lees
met die bril van die Gees
word U Seun, as kosbaarste skat, die rede
vir lewenspassie, vreugde en vrede!

O genadige God en Heer,
aan U kom toe alle eer!

1 2 3 4 5 7