Hoor Ethan se koor

with No Comments

(Psalm 147 is losweg gebruik met woorde uit die 1983 en 2020 vertalings)

Pappa en mamma ek wil dat julle hoor,
die halleluja lied van ons kinderkoor.
Ons sing tot lof van ons Heer,
dit is ‘n genot om Hom te vereer. (Ps 147:1)

Julle moet asseblief op die Here bly vertrou:
Dit is Hy wat julle weer op sal bou.
Hy genees die gebrokenes van hart
en verbind julle wonde van smart. (Ps 147:2-3)

Op aarde kon ek nie skool toe gaan,
maar hier is nie perke in verstaan.
Oom Abraham het ons van sterre geleer
ek kan nou al almal se name reseteer! (Ps 147:4)

Die Here het nasies in hom geseën,
daarom leer ek nou op sy been! (Gen 12:1-3)
God laat die hulpeloses weer opstaan, (Ps 147:6)
dis so bevrydend na my aardse bestaan!

Ons Here is groot en geweldig sterk
sy kennis en insig is onbeperk!
Oom Dawid begelei ons met die lier.
Tot eer van God sing ons lofliedere hier: (Ps 147:5,7)

Hy oordek die hemel met wolke,
Hy voorsien reën vir alle volke
en laat gras op die bergland uitspruit.
Hy gee aan die diere hulle weiding daaruit. (Ps 147:8-9)

Op aarde was my krag nie vreeslik baie werd,
maar die Here het niks aan die krag van ‘n perd
of die liggaamskrag van ‘n soldaat,
maar vind vreugde in dié wat hul op Hom verlaat. (Ps 147:10-11)

Juis dié grootste skat wat bestaan, het ek by julle gekry,
selfs meer as al die hospitaal toe se geryery!
Deur julle het Ek God se troue liefde leer ken, (Ps 147:11)
saam met julle onder die vlerke van die Hen. (Mat 23:37)

Gister het ek huppelend gaan speel,
en wat gebeur het, moet ek deel:

‘n Luiperd het by ‘n boklam gelê,
‘n Wolf rustig by ‘n lammetjie wat mê.
‘n Jong leeu was ook daar
met vetgemaakte vee bymekaar.

Ek kon hulle daar rond lei
nie een was eers bang vir my. (Jes 11:6-7)

Oupa en Moses sing toe ‘n duet van lof:
“U laat sterflinge terugkeer tot stof.
Duisend jaar is soos ‘n dag,
soos ‘n wagbeurt in die nag.” (Ps 90:3-4)

Die agt jaar van vreugde en swaar
teen ewigheid, so weglaatbaar…
Julle koms is ook al in sig,
dan leef ons saam in Sy Lig.

Hy het Sy Woord vir julle gegee:
Begin elke nuwe dag daarmee,
sodat die Gees julle daartoe kan lei
om ietsie van wat ek beleef te kry.

As julle dan aan God die hulde bring,
weet dat ons kinderkoor saam met julle sing! (Ps 147:19-20)

Stamseloorplanting

with No Comments

Vir die dokter ‘n vraag:
Iets hier binne knaag?
“Bloedkanker verteer,
geen witbloedselle meer…”

Die “gesonde” mense is aan die jaag
die druk van die lewe knaag.
soos kanker word almal verteer
Niks oor om Satan te keer…

Mevrou jy sal moet isoleer,
met chemo en nog meer.
‘n Stamseloorplanting sal wees
die enigste om weer te genees.

Jy, “gesonde”, moet jouself isoleer
en weer in die Bybel van my leer.
Jou oorplanting sal wees
‘n kliphart na een vol Gees.

Midde in die strawwe tyd
stuur sy ‘n boodskap uit:
“Die Here gee my hiervoor krag
op sy genesing sal ek wag.
Selfs die chemo maak nie naar,
oor alles is ek dankbaar.
Ek ervaar die Here se seën
deur hierdie proses heen.”

Jy, “gesonde”, met niks tyd
besin weer oor jou prioriteit.
Hou op planne maak in eie krag,
hou op jaag, en leer om te wag.
Begin die Here ervaar
en word weer dankbaar.
Die Here sal jou seën
deur hierdie proses heen.

‘n Psalm van Dawid, gesing deur Cecile

with No Comments

Paul, ek onthou nog jy het mechano’s gebou.
My dogters, julle het as skoenlappers ontvou.
My man, jy kon Clover se melk balansseer,
maar bowenal leef julle tot God se eer…

Dis natuurlik om nou oor my te rou,
maar psalm drie en twintig het ontvou.
As nuwe hemelse aankomeling
wil ek dit nou vir julle sing:

Ek het nie bang deur donker dieptes gegaan,
want ek het die krag van die psalm verstaan:
Die oomblikke in die hospitaal was heilig,
want in Sy hande was ek heeltyd veilig… (Ps 23:4)

Maar nou is ek by my Herder –
ek kort regtig niks verder! (Ps 23:1)
Hier waar regtig sagte groen weivelde is
en die waterstrome – onbeskryflike rus! (Ps 23:2)

Hier kan ek nog meer uitbundig lag,
want Sy teenwoordigheid, o die krag!
Hier kom al die paaie saam
en ons eer sy heilge Naam! (Ps 23:3)

Ek voel so lig in my klere van wit
as ek hier by die feesmaal aansit.
Soos ‘n eregas het Hy my ontvang
oorlaai met hartlikheid en sang. (Ps 23:5)

Die dood is vir my ‘n reuse wins
want hier kry ek goedheid en guns
tot in lengte van dae is ek tuis
hier in die Here se huis. (Ps 23:6)

So as julle verlang en aan my dink,
moet julle hierdie psalm indrink,
want langs die Herder se waterstrome,
ontmoet ons in die rus van julle drome.

Die Covid golwe

with No Comments

Soos die tweede Covid golf nou lig,
skryf ek aan jou hierdie gedig,
want ons altwee se emosies moet uit
voor die derde golf ons weer stuit…

Die groter gulpende golf het hierdie keer
ons boot se seile met die dood geskeur.
Avbob ‘n daaglikse gesig in die hosptiaal
om iemand se geliefde te kom haal.

Jy kon telkens vir my eerstehands getuig
hoe is gesondheidswerkers se maste gebuig.
Julle moes vandag nog iemand moed in praat,
want in die sinkende skip is môre te laat!

Penny se dood ruk ook hier binne my:
Jare in die kerk gesit – reg agter my.
Hy het my altyd ‘n klop op die skouer gegee
met ‘n “Seuntjie, hoe gaan dit?” daarmee…

Al het hy nie van Covid gesterf,
het Covid sy begrafnis bederf.
Die familie was buite die land se grense.
Dis nie dieselfde: Elektroniese laaste wense…

In die eerste golf het die Here ons geleer:
Hý is die een wat die hele wêreld beheer.
Hy het die woeste storm bestraf
en die Covid golf neem toe af.

Hierdie tweede golf het Hy ons laat onthou,
dat die lewe nie met die dood ophou,
want selfs deur die dal van dooskaduwee
seil die Herder saam in ons bootjie mee.

lees ek toe Johannes tien
en wat mens daar van die Goeie Herder sien:
Dis Hy wat sy lewe vir die skape aflê,
ons is syne, en Covid het nie daarin ‘n sê.

Hy is ook die pad na die Vader se deur,
Covid kan ons toegang nie keer.
Na groen weivelde is waarheen Hy ons lei
om daar lewe, ja in oorvloed, te kry!

Jy moet saam met my in die Woord weiveld wei,
dat ons lewensbootjie weer nuwe seile kan kry.
Sodat, as die derde golf weer kom,
oorspoel hy ons nie, maar ry ons hom!

Soveel te meer

with No Comments

Here, ek weet
ek het U vergeet.
U is seker vir my kwaad,
maar ek moet met U praat:

Na my skof by die hospitaal
het ek in die natuur kom asem haal.
Die wintergras spreek in droeë taal
van my eens suksesvolle verhaal.

Ek was nog altyd die beste dokter gewees –
En kon mense van allerlei siektes genees.
Maar na hierdie derde golf kan ek nie meer –
Ek verloor pasiënte keer op keer.

Vandag was daar twee besig om te versmoor,
maar daar was net een ventilator oor.
Ek gee dit toe maar vir die man in bed ses,
hy is jonger en sy besigheid ‘n sukses.

Die ou man is na die ander kamer oorgeplaas
waar hy onvermydelik sy laaste asem uit sal blaas…
Die foon doodgedruk toe sy familie bel,
ek moet aangaan – die oordeel is gevel.

Die baba voëltjie se bekkie wawyd oop
die ma kom ‘n waterduppeltjie daarin doop.
Heen en weer vlieg sy getrou
terwyl hy sy bekkie oophou.

Na elke pasiënt het sy weer by die ou oom ingegaan.
Ons kan niks vir hom doen nie – kan sy nie verstaan?
Uit nuuskierigheid het ek later ongemerk gaan kyk.
Ek sien toe hoe sy, sy droeë lippe met ‘n nat lappie bestryk.

Here hier voor U is ek stukkend
trane rol, my bors rukkend.
Ek het al baie mense gesond gemaak,
maar nog nooit iemand so teer aangeraak…

Here, is U regtig in beheer?
Ek wil my bekeer,
sal U my leer
hoe ek U kan eer?

Jy vra: Is ek in beheer?
Soveel te meer!

Ek het die man na die ventilator gestuur –
dit was nog nie sy uur
Ek het geweet
hy is nog nie gereed…

Jy vra: Is Ek in beheer?
Soveel te meer!

Die ou man, ‘n man van vrede,
“Ek het dors”, sy laaste bede.
Ek het haar vir hom gestuur
en jou geroep in dieselfde uur!

Sy swaakry tyd was weglaatbaar min –
hy is in My ewige vreugde in.
Hy het altyd eers my koninkryk gesoek,
sy lewe gerig deur My Boek:

Oor die voëls is My sorg getrou,
soveel te meer vir jou! (Mat 6:26)
As ek die veldlelies so mooi beklee,
sal Ek soveel te meer vir jou omgee! (Mat 6:28)

As Ek sorg vir die gras van die veld,
soveel te meer as jou baie geld! (Mat 6:30)
Soek van nou af My koninkryk
dan sal al jou sorge wyk… (Mat 6:33)

In die dammetjie sien ek die lelie se wit,
en vir die eerste keer kon ek opreg bid.
Die grasse begin wuifend juig
terwyl die voëltjie sy lof betuig:

Soveel te meer
God in beheer!
Soveel te meer:
Aan Hom die eer!

1 2 3 4 79